Пачынаючы з 1946 года, калі была створана Міжнародная рада музеяў (ICOM International) пры ЮНЕСКА, у 145 краінах свету былі заснаваны Нацыянальныя камітэты ICOM, якія з’яўляюцца юрыдычнымі асобамі, зарэгістраванымі ў сваіх краінах. Яны ўпаўнаважаны Выканаўчай радай ICOM International прадстаўляць інтарэсы музеяў і музейных прафесіяналаў, а таксама арганізоўваць дзейнасць ICOM у сваіх краінах. ICOM International з’яўляецца няўрадавай арганізацыяй музеяў і музейных спецыялістаў, якая налічвае больш за 40 000 членаў па ўсім свеце.

Грамадскае аб’яднанне «Беларускі камітэт Міжнароднай рады музеяў “ІКОМ”» (ГА «БКМСМ “ІКОМ”»), афіцыйна зарэгістраванае ў Сакратарыяце ICOM у Парыжы як нацыянальная асацыяцыя пад нумарам 43, афіцыйна прадстаўляе ICOM у Беларусі з 2000 года. Як і іншыя нацыянальныя камітэты ICOM па ўсім свеце, ІКОМ Беларусі выступае ў якасці асноўнага канала сувязі паміж членамі ў сваёй краіне і Сакратарыятам ICOM у Парыжы.