У невялікім дрэздэнскім доме-музеі знакамітага польскага пісьменніка, мастака, гісторыка і кампазітара Юзафа Ігнацыя Крашэўскага (1812 – 1887), размешчаным у Дрэздэне па адрасе вул. Нордштрасэ, 27 (цяпер №28), стажоры з Беларусі пазнаёміліся не толькі з важнай часткай біяграфіі выдатнага чалавека, але і з канцэпцыяй гэтага мемарыяльнага музея, а таксама сістэмай кіравання муніцыпальнымі музеямі ў Дрэздэне.
Музей Крашэўскага, які ўваходзіць у муніцыпальнае аб'яднанне музеяў горада Дрэздэна, быў заснаваны ў 1960 годзе ў доме, у якім пісьменнік жыў падчас 20-гадовай ссылкі. Ён пасяліўся тут у 1863 годзе, абраўшы Дрэздэн месцам сваёй вымушанай эміграцыі пасля адмовы ў 1862 годзе ад расійскага падданства і распараджэння 1963 года аб высылцы з Расійскай імперыі за рэзкую крытыку палітыкі ўрада. У Дрэздэне, які ў той час быў адным з цэнтраў польскай эміграцыі, Крашэўскі выдаваў польскамоўны штотыднёвік “Tydzień” (выходзіў у 1870 – 1871 гг.), працаваў над навуковымі працамі і стварыў мноства твораў – літаратурных, музычных, мастацкіх.
Сустрэча і трэнінг у Музеі Крашэўскага ў рамках нямецкай праграмы Рэгіянальнай музейнай Акадэміі-2019 былі цікавыя для гурта з Беларусі па многіх напрамках. Асаблівасць музея Крашэўскага - яго двухнацыянальнасць. Даўнія палітычныя і культурныя сувязі Польшчы і Саксоніі былі пастаянным прадметам даследаванняў Ігнацыя Крашэўскага. Экскурсія і гутарка з кіраўніком музея сп. Эрыкай Эшэбах і прадстаўніком муніцыпальнага кіравання музеямі сп. Магач закраналі тыя моманты польскай гісторыі, якія праз прызму біяграфіі Крашэўскага датычыліся і гісторыі Беларусі (у прыватнасці, тое, што родавым гняздом Юзафа Ігнацыя быў бацькаў маёнтак Доўгі. ля Пружан, на тэрыторыі сучаснай Беларусі, менавіта там пачалося яго захапленне літаратурай).
Дзейнасць большасці стажораў звязана з невялікімі музеямі, таму экспазіцыйныя прыёмы, якія дазваляюць адлюстраваць у абмежаванай прасторы дома-музея маштабныя з'явы, сталі прадметам асаблівай увагі. У ходзе наведвання стажорамі былі выкананы самастойныя заданні па аналізе экспазіцыі. Таксама важнай скразной тэмай была інтэграцыя і супрацоўніцтва розных музеяў, аб'яднаных адной тэмай ці персонай.
Звярнутыя адзін да аднаго профілі Юзэфа Ігнацыя Крашэўскага і Адама Міцкевіча на памятных медалях не выпадкова размешчаны ў экспазіцыі побач. Сярод многіх дзеячаў польскай культуры, якія папулярызуюцца Крашэўскім, Міцкевіч быў першым і найбольш ушанаваным.
Кіраўнік музея Эрыка Эшэбах прадстаўляе асноўную экспазіцыю музея. Нягледзячы на абмежаванасць прасторы, тут удалося праз невялікую колькасць экспанатаў даць уяўленне аб вялізнай культурнай спадчыне Юзэфа Ігнацыя Крашэўскага. Большую частку яго складаюць тэксты – каля 600 тамоў раманаў і аповесцей, паэтычных і драматычных твораў, а таксама работ па гісторыі, этнаграфіі, фалькларыстыцы, дарожных нарысах, публіцыстычных і літаратурна-крытычных артыкулаў. Таму стэнды, якія прадстаўляюць спадчыну Крашэўскага, маюць правобразам дызайнерскага рашэння вокладкі расчыненых кніг.
На занятку шмат увагі надавалася пытанням музеефікацыі такіх персаналій як Крашэўскі і многія іншыя, якія належаць адразу дзвюм ці тром культурам, звязаным з гісторыяй стазу некалькіх краін. Часта такія фігуры выклікаюць спрэчкі аб прыярытэтнай культурнай прыналежнасці. Як пазбегнуць тэндэнцыйнасці і спрашчэння ў працы над музейнай экспазіцыяй у такіх выпадках, як аб'ядноўвацца з іншымі музеямі ў звязаных з дадзенай тэмай краінах, як ім узаемадапаўняць адзін аднаго ў прафесійным полі - пра гэта ішла размова на сустрэчы са стажорамі.
Прадстаўнік муніцыпальнага кіравання музеямі г-жа Магач (першая злева) і кіраўнік Музея Крашэўскага г-жа Эрыка Эшэбах (другая злева) распавялі аб тым, як існуе і працуе музей. Д-р Крысціна Янеке (справа) мадэравала гутарку.
У доме-музеі прадстаўлены не толькі кнігі аўтара, але і прадметы побыту і інтэр'ера, узнаўляючы атмасферу былога кабінета Крашэўскага, дзе былі напісаны такія вядомыя гістарычныя раманы як "Графіня Казель" і "Брюль", прысвечаныя эпосе праўлення Аўгуста Моцнага. Спецыяльная выстава расказвае пра гісторыю польска-саксонскіх адносін.
Пасмяротная маска Адама Міцкевіча займае важнае месца ў экспазіцыі, як і сама асоба вялікага польскага паэта - у лёсе і творчасці Крашэўскага. Гэтая сувязь не спыняецца і цяпер: новая пастаянная экспазіцыя аб жыцці і творчасці Ігнацыя Крашэўскага, якая дзейнічае з пачатку 2013 года ў трох залах дома-музея, арганізавана музеем Адама Міцкевіча ў Варшаве ў рамках узаемадзеяння і супрацоўніцтва.
Масіўны пісьмовы стол у былым кабінеце Юзэфа Ігнацыя Крашэўскага, аднаго з самых прадуктыўных еўрапейскіх аўтараў – найбуйнейшы экспанат дома-музея і адначасова музейная вітрына, дзе падбор прадметаў адлюстроўвае шырокія навуковыя інтарэсы гаспадара, які быў членам Акадэміі ведаў у Кракаве (польскай навуковай арганізацыі) навуковага таварыства) з моманту яе стварэння ў 1872 годзе.
Акрамя пісьмовага стала, экспазіцыя былога кабінета Юзэфа Ігнацыя Крашэўскага ўключае каля 60 экспанатаў, у тым ліку калекцыю медалёў з выявамі выдатных дзеячаў гісторыі і культуры Польшчы – свайго роду асабісты пантэон Крашэўскага.
Прыкладам самастойных заданняў сталі даследчыя вандроўкі стажораў з фотаапаратам па экспазіцыі музея для прапрацоўкі тэмы «Камунікацыя музея і наведвальніка праз аб'ект» і наступная праца ў групах.
